निवृत्त वेतन धारकांच्या समस्यांचे निवारणसाठी 9 डिसेंबरला बैठक

 धुळे दि. निवृत्ती वेतन धारकांच्या समस्या व अडचणीबाबत कोषागार अधिकारी, धुळे यांच्या दालनात दिनांक 9 डिसेंबर, 2011 रोजी सकाळी 11.00 वाजता बैठकीचे आयोजन करण्यात आलेले आहे. या बैठकीस सर्व निवृत्ती वेतन धारकांनी तसेच जे निवृत्त वेतन धारक इतर राज्याचे आहेत परंतु ते धुळे कोषागार कार्यालयामार्फत निवृत्ती वेतन घेत आहेत अशा निवृत्ती वेतन धारकांनाही या बैठकीस उपस्थित रहावे असे आवाहन कोषागार अधिकारी प्र. शि. निंबाळकर व अप्पर कोषागार अधिकारी गो. सा. पाटील यांनी केले आहे. 

ग्रंथोत्सव-2011 व ग्रंथविक्री केंद्राचा जनतेने लाभ घ्यावा

      धुळे, दि.;- दर्जेदार ग्रंथ जनतेपर्यंत पोचविण्याच्या उद्देशाने महाराष्ट्र राज्य साहित्य आणि संस्कृती मंडळातर्फे राज्यात सर्व जिल्हयात सुरु असलेले ग्रंथोत्सव अभियान जिल्हा माहिती कार्यालयाच्यावतीने दि. 13 ते 15 डिसेंबर, 2011 पर्यंत तीन दिवस राजर्षी छत्रपती शाहू महाराज नाटयमंदिर येथे ग्रंथोत्सव-2011 चे आयोजन करण्यात आले आहे.  ग्रंथोत्सवातील पुढील कार्यक्रमांचा जिल्हयातील जनतेने लाभ घ्यावा, असे आवाहन नाशिक विभागीय माहिती उपसंचालक प्रसाद वसावे व जिल्हा माहिती अधिकारी जगन्नाथ पाटील यांनी केले आहे.

       ग्रंथोत्सवात मंगळवार दि. 13 डिसेंबर, 2011 रोजी सकाळी 9-30 वाजता सर्वोदय कॉलनी, न्यू सिटी हायस्कूलजवळील जिल्हा शासकीय ग्रंथालय येथून ग्रंथदिंडी जिल्हाधिकारी प्रकाश महाजन यांच्या अध्यक्षतेखाली तर महाराष्ट्र साहित्य परिषदेचे धुळे जिल्हा अध्यक्ष प्रा. अनिल सोनार यांच्या हस्ते उदघाटन होणार असून, ग्रंथदिंडी स्वस्तिक चित्र मंदिर, फुलवालाचौ आग्रारोड मागे ग. क्र. 6 येथून पारोळा रोड या मार्गाने निघणार असून  ग्रंथदिंडीचा समारोप राजर्षी छत्रपती शाहू महाराज नाटयमंदिर, पारोळा रोड, धुळे येथे सकाळी 11-00 वाजता होईल.  यावेळी महापौर सौ.मंजुळा गावीत, जिल्हा पोलीस अधिक्षक प्रदीप देशपांडे, महानगरपालिका आयुक्त हनुमंत भोंगळे यांची प्रमुख उपस्थिती राहील.

       ग्रंथोत्सवात दि. 13 ते 15 डिसेंबर, 2011 या दरम्यान राजर्षी छत्रपती शाहू महाराज नाटयमंदिर पारोळा रोड येथे होणार आहे. मंगळवार दि. 13 डिसेंबर, 2011 रोजी सकाळी 11-00 वाजता ग्रंथजत्रेचे उदघाटन जिल्हाधिकारी प्रकाश महाजन यांच्या हस्ते होईल.  यावेळी कार्यक्रमाचे उदघाटक व उपस्थित मान्यवरांचे विचार प्रकटन तसेच सायंकाळी 6-00 ते रात्रौ 9-00 रंग शाहिरी कलेचा, शाहीर शिवाजीराव धर्मा पाटील आणि मंडळी यांचा कार्यक्रम होईल.

       दि. 14 डिसेंबर, 2011 रोजी सायंकाळी 6-00 ते रात्रौ 9-00 कवी संम्मेलन आयोजित करण्यात आले आहे, दि. 15 डिसेंबर, 2011 रोजी सायंकाळी 6-00 ते रात्रौ 9-00 सुप्रसिध्द मराठी साहित्यिक     प्रा. अनिल सोनार यांची मुलाखत मी महाराष्ट्र वाहिनीचे संचालक चंद्रशेखर पाटील हे घेतील. 

       ग्रंथोत्सव स्थळी ग्रंथ विक्री केंद्रावर हजारो महत्वपूर्ण ग्रंथांचा खजिना तीन दिवस वाचकांसाठी सकाळी 9-30 वाजेपासून खरेदीस उपलब्ध राहील. तरी ग्रंथोत्सव कार्यक्रम व ग्रंथविक्री केंद्राचा जनतेने लाभ घ्यावा.

गर्भधारणापूर्व व प्रसुतीपूर्व निदानतंत्र कायद्याचे उल्लंघन करणा-या डॉक्टरांवर टास्क फोर्स पथकाने कारवाई करावी जिल्हाधिकारी प्रकाश महाजन

धुळे :- धुळे शहरात आजही बाहेरचे रुग्ण येवून काही डॉक्टरांच्या मदतीने गर्भलिंग तपासणी सारखे गंभीर प्रकार करत असून त्यांना मदत करणा-या डॉक्टरांवर कायदेशिर कारवाई करण्यासाठी महानगरपालिका व जिल्हा शल्य चिकित्सक यांच्या टास्‍क फोर्स पथकाने अचानक अशा दवाखान्यांची तपासणी करुन त्यांच्या ए फॉर्ममध्ये काही त्रुटया असल्याचे दिसले तर सरळ त्यांच्यावर गुन्हे नोंदवावीत अशा सुचना जिल्हाधिकारी प्रकाश महाजन यांनी दिल्या.

       जिल्हाधिकारी प्रकाश महाजन यांच्या अध्यक्षतेखाली जिल्हाधिकारी कार्यालयात पीसीपीएनडीटी जिल्हास्तरीय सल्लागार समितीच्या बैठकीचे आयोजन करण्यात आले होते. यावेळी मनपा आयुक्त हनुमंत भोंगळे, जिल्हा आरोग्य अधिकारी डॉ. महाले, जिल्हा शल्य चिकित्सक डॉ. एस. एन. लाडीकर, जिल्हा परिषदच्या समाज कल्याण अधिकारी श्रीमती देवरे, डॉ. कुळकर्णी, रविंद्र इंगळे, मनपाचे डॉ. डी. बी. माळी, डॉ. प्रदिप पाटील, अड.गणेश पाटील, सचिन कुंभार उपस्थित होते.

       जिल्हाधिकारी प्रकाश महाजन यावेळी म्हणाले की, गर्भधारणापूर्व व प्रसुतीपूर्व निदानतंत्र (लिंग निवडीस प्रतिबंद) कायद्याची परिणामकारक अंमलबजावणी होण्यासाठी आरोग्य विभागाने ग्रामीण भागात कार्यशाळा घ्यावी. तसेच डॉक्टरांनी पेशंटची एमपीटी करण्यापूर्वी आरोग्य विभागात त्याची माहिती दिली पाहिजे. त्याशिवाय एमपीठी केल्यास कायदेशिर कारवाई करण्यात येईल. त्याचप्रमाणे ए फॉर्म मध्ये नोंदणी करतांना काही त्रुट्या आढळल्यास टास्क फोर्स पथकाचे संबंधित डॉक्टरांनावर केसेस दाखल करुन त्यांचे सोनोग्राफी सेंटर सिल करावित. तसेच काही डॉक्टर सोनोग्राफी मशिन बंद असल्याचे सांगून गर्भलिंग निदान सारखे उद्योग करीत असल्याचे आढळल्यास त्यांच्यावर गंभीर गुन्हे दाखल करण्यात येतील. याची संबंधित डॉक्टरांनी नोंद घ्यावी. सामाजिक स्वास्थ बिघडू नये यासाठी डॉक्टरांनी असे कृत्य करणाऱ्याला जनतेसमोर आणून प्रशासनाला मदत करावी असेही जिल्हाधिकारी प्रकाश महाजन यांनी सांगितले. तसेच असे कृत्य कोणी करत असेल तर www.amchimulgi.com यावर एस.एम.एस. करावा. असेही आवाहन त्यांनी जनतेस केले आहे.

       प्रारंभी जिल्हा शल्य चिकित्सक डॉ. एस. एन. लाडीकर यांनी सांगितले की, आता न्यायालयाच्या निर्णयानेच पोर्टबेल सोनोग्राफी मशीन वापरण्यास बंदी आणली असून ते जर कोणी डॉक्टर वापरत असतीलतो गुन्हा आहे. काही औषध विक्रेते जर गर्भपात करण्यासारखी औषधे बेकायदेशिरपणे विक्री करत असल्याचे आढळले तर अशा औषध विक्रेत्यांचे परवाने रद्द करुन त्यांच्यावर दंडात्मक कारवाई करण्यात येईल असेही त्यांनी यावेळी सांगितले. 

महानगरपालिकेत डिसेंबर-2011 मधील लोकशाही दिन होणार नाही

धुळे, दि.2:- महाराष्ट्रातील सर्व नगरपरिषदा, नगरपंचायती यांच्या निवडणूकीचा कार्यक्रम घोषित करण्यात आलेला आहे. वरील निवडणूका कालावधीत दि.1 नोव्हेबर,2011 पासून आचारसंहिता लागू करण्यात आलेली असल्यामुळे माहे डिसेंबर-2011 च्या पहिल्या सोमवारी दि. 5 डिसेंबर, 2011 रोजी आयोजित करण्यात आलेल्या महानगरपालिकेत लोकशाही दिनाचे आयोजन करण्यात आलेले नाही.याची सर्व नागरिकानी नोंद घ्यावी असे धुळे महानगरपालिकेचे आयुक्त हनुमंत भोंगळे यांनी एका प्रसिध्दी पत्रकान्वये कळविले आहे.

96 वी अखिल भारतीय व्यवसाय परिक्षेसाठी शिकाऊ उमेदवारानी अर्ज करावे

धुळे दि.2 :- राष्ट्रीय व्यावसायिक प्रशिक्षण परिषद, नवी दिल्ली (एन.सी.व्ही.टी)मार्फत घेण्यात येणारी शिकाऊ उमेदवारांची 96 वी अखिल भारतीय व्यवसाय परिक्षा एप्रिल-2012 च्या शेवटच्या आठवडयात अपेक्षित असुन  शिकाऊ उमेदवार व संबधीत आस्थापनांच्या मालकांनी याची नोंद घ्यावी असे मुलभुत प्रशिक्षण तथा अनुषंगिक सूचना केंद्र तसेच औद्योगिक प्रशिक्षण केंद्राचे अंशकालीन प्राचार्य व्ही.एम.राजपूत यांनी एका प्रसिध्दी पत्रकान्वये कळविले आहे.

       महाराष्ट्र राज्यातील परिक्षेस बसणा-या उमेदवारानी शिकाऊ उमेदवाराचे संविदा /करारपत्र ज्या मुलभूत प्रशिक्षण तथा अनुषंगिक सूचना केंद्रात सादर केलेले आहे. त्याच मुलभूत प्रशिक्षण तथा अनुषंगिक सुचना केंद्रामध्ये फारमेट-3 व 3 ए हया विहित नमुन्यात उमेदवारांची माहिती आस्थापनेच्या पत्रासह दि.20 डिसेबर,2011 पर्यत पाठवावी. आस्थापनांनी शिकाऊ उमेदवाराचे पात्रता प्रमाणपत्र विहित केलेल्या फारमेट-4 मध्ये अखिल भारतीय व्यवसाय परिक्षा सुरु होण्यापूर्वी 15 दिवस अगोदर परिक्षा केंद्रास पाठविण्यात यावे. परिक्षेस बसण्यास पात्र असणा-या सर्व शिकाऊ उमेदवारांनी विहित नमुन्यात परिक्षा अर्ज शुल्क रुपये 10/- व एक वर्ष अभ्यासक्रमाकरिता परिक्षा शुल्क रु.50/- व दोन वर्षे अभ्यासक्रमाकरिता परिक्षा शुल्क रु.75/- दि.31 डिसेबर,2011 पुर्वी भरावे.

       शिकाऊ उमेदवाराबरोबर खालीलप्रमाणे अटी पूर्ण  करणा-या खाजगी उमेदवार म्हणून परिक्षेस बसू इच्छिणा-या व माजी खाजगी उमेदवारांनी अर्जाच्या विहित नमुन्यासाठी व सविस्तर माहितीपत्रकासाठी संबधीत जिल्हयातील जिल्हयाच्या ठिकाणी असलेल्या शासकीय ‍औद्योगिक प्रशिक्षण संस्थेच्या प्राचार्याशी संपर्क साधुन दि.15 जानेवारी,2012 पूर्वी अर्ज सादर करावेत.

       एन.सी.व्ही.टी परिक्षेस बसणा-या शिकाऊ उमेदवाराच्या अटी व शर्ती पुढीलप्रमाणे आहे. उमेदवार शिल्पकारागिर प्रशिक्षण योजने  अंतर्गत संबधीत व्यवसाय अभ्यासक्रमाची परीक्षा उत्तीर्ण असावा तसेच एन.टी.सी नंतर 1 वर्षाच्या अभ्यासक्रमासाठी 4 वर्ष व 2 वर्षाच्या अभ्यासक्रमासाठी दोन वर्षाचा अनुभव आवश्यक आहे., उमेदवार कार्यरत असलेली आस्थापना शिकाऊ उमेदवारी योजनेतंर्गत अथवा शासकीय/ निमशासकीय उपक्रमातंर्गत कार्यरत असावी. 

नगरपरिषदांच्या मतदानाच्या तारखेत बदल 177 नगरपरिषदांसाठी 11 डिसेंबरला मतदान

मुंबई,  राज्यातील 188 नगरपरिषदा/नगरपंचायतींच्या निवडणुका 8 डिसेंबर 2011 रोजी होणार होत्या. परंतु बऱ्याच नगरपरिषदा/नगरपंचायतींच्या प्रभागांतील उमेदवारी अर्जांसंदर्भात न्यायालयात अपील दाखल झाल्यामुळे मतदानाच्या तारखेत बदल करण्यात आला असून आता 177 नगरपरिषदांच्या निवडणुका 11 डिसेंबर 2011 रोजी, तर आज 

(ता. 2 डिसेंबर) न्यायालयाचा निकाल लागलेल्या नगरपरिषदांच्या निवडणुका 13 डिसेंबर 2011 रोजी होणार आहेत.

ज्या नगरपरिषदा/नगरपंचायतींसंदर्भात अपील दाखल झालेले नाही, तसेच जेथील अपिलांवरील न्यायालयाचा निर्णय 1 डिसेंबर 2011 पर्यंत प्राप्त झाला आहे. त्यांचे मतदान 11 डिसेंबर 2011 रोजी घेण्यात येईल. या निवडणुकांचा जाहीर प्रचार 9 डिसेंबर 2011 रोजी रात्री बारा वाजता संपेल. त्यांची मतमोजणी त्याच दिवशी सायंकाळी 6.30 वाजता किंवा दुसऱ्या दिवशी 12 डिसेंबर 2011 रोजी होईल.

ज्या नगरपरिषदा/नगरपंचायतींच्या काही प्रभागात अपील झाले होते व ज्या अपिलांवरील निर्णय 2 डिसेंबर 2011 रोजी प्राप्त झाले आहेत त्यांचे मतदान 13 डिसेंबर रोजी होईल. त्यांचा जाहीर प्रचार 11 डिसेंबर 2011 रोजी रात्री बारा वाजता संपेल. त्यांची मतमोजणी त्याच दिवशी सायंकाळी 6.30 वाजता किंवा दुसऱ्या दिवशी 14 डिसेंबर 2011 रोजी होईल.

ज्या नगरपरिषदा/नगरपंचायतींच्या मुदती 16 डिसेंबर 2011 पर्यंत संपणार आहेत आणि ज्यांच्या अपिलांचे निकाल 2 डिसेंबर 2011 पर्यंत प्राप्त झालेले नाहीत. त्या नगरपरिषदांची स्थापना करण्यासाठी, अपील झालेल्या जागांशी संबंधित प्रभाग वगळून उर्वरित प्रभागांतील जागांची संख्या जर नगरपरिषदा/नगरपंचायतींच्या एकूण जागांच्या 2/3 (दोन तृतीयांश) किंवा त्यापेक्षा अधिक होत  असल्यास सदर नगरपरिषदा/नगरपंचायतींच्या अपिलात नसलेल्या प्रभागातील जागांसाठीचे मतदान 11 डिसेंबर 2011 रोजी होईल. तसेच ज्या प्रभागांतील जागांकरिता अपील झालेले आहे, परंतु निकाल लागलेले नाहीत व ज्या नगरपरिषदांची मुदत 16 डिसेंबर 2011 रोजी संपत आहे. त्या नगरपरिषदांची स्थापना करण्यासाठी अपील झालेल्या जागांशी संबंधित प्रभाग वगळून उर्वरित प्रभागातील जागांची संख्या जर नगरपरिषदा/नगरपंचायतींच्या एकूण जागांच्या 2/3 (दोन तृतीयांश) किंवा त्यापेक्षा अधिक होत नसेल तर सदर नगरपरिषदा/नगरपंचायतींच्या प्रलंबित अपिलात असलेल्या जागा वगळून उर्वरित सर्व जागांसाठी 11 डिसेंबर 2011 रोजी मतदान होईल.

                                             

नगरपरिषदांच्या मतदानाच्या     

जाहीर प्रचाराची समाप्ती त्या त्या दिवशी रात्री बारा वाजता होणार असली तरी राजकीय पक्ष व उमेदवारांना रात्री दहा नंतर सार्वजनिक सभा, मोर्चे, ध्वनिवर्धकाचा वापर करता येणार नाही, असे राज्य निवडणूक आयोगाने कळविले आहे.

 नगरपरिषदांच्या निवडणुकांसाठी नामनिर्देशनपत्र स्वीकारणे अथवा नाकारण्याच्या निर्णयाविरुद्ध नगरपरिषद निवडणूक नियम 1966 च्या नियम 15 मधील तरतुदीनुसार संबंधित उमेदवारास जिल्हा सत्र न्यायालयामध्ये अपील दाखल करता येईल, अशी तरतूद असल्याने बऱ्याच प्रभागातील उमेदवारी अर्जांसंदर्भात अपील दाखल झाले आहेत. या अपिलांचा निकाल जाहीर झाल्यापासून उमेदवारी मागे घेण्याकरिता तीन दिवसांचा कालावधी देण्याची तरतूद या नियमात आहे आणि उमेदवारी मागे घेण्याच्या दिनांकापासून आठव्या दिवसाचा दिनांक मतदानाकरिता पुनर्निर्धारित करण्याची तरतूद आहे.

वेगवेगळ्या प्रभागांमधील अपिलांचे निकाल वेगवेगळ्या दिवशी लागल्यामुळे सर्व नगरपरिषदा/नगरपंचायतींच्या निवडणुका एकाच दिवशी म्हणजे 8 डिसेंबर 2011 रोजी घेता येणे शक्य नाही. तसेच बहुतेक नगरपरिषदा/नगरपंचायतींच्या मुदती 16 डिसेंबर 2011 रोजी संपत आहेत. या कालावधीत नवीन नगरपरिषदा/नगरपंचायतींची स्थापना होणे आवश्यक आहे.

दरम्यान, 23 डिसेंबर 2011 रोजी होणाऱ्या नांदेड जिल्ह्यातील बिलोली, मुदखेड, मुखेड, कंधार, कुंडलवाडी, देगलूर या सहा आणि लातूर जिल्ह्यातील अहमदपूर ही एक अशा एकूण सात नगरपरिषदांच्या निवडणुकांच्या कार्यक्रमात कोणताही बदल करण्यात आलेला नाही. या निवडणुका पूर्वनियोजित कार्यक्रमानुसारच होतील.

                         0-0-0