मुंबई, दि. 30 : महाराष्ट्र सरकारने जाहीर केलेल्या माहिती तंत्रज्ञान विषयक नवीन धोरणाचा परिणाम म्हणून या क्षेत्रात साडेचार हजार कोटींची गुंतवणूक जाहीर झाली असून राज्यात तब्बल 50 हजार रोजगार उपलब्ध होणार आहेत. अमेरिकेच्या दौऱ्यावर असलेल्या मुख्यमंत्री देवेंद्र फडणवीस यांच्या नेतृत्वाखालील शिष्टमंडळाने आज ब्लॅकस्टोन उद्योगसमुहाशी याबाबतच्या सामंजस्य करारांवर स्वाक्षऱ्या केल्या. देशभरात उद्यापासून ‘डिजिटल इंडिया वीक’ या अभियानास प्रारंभ होत असताना महाराष्ट्राने हा सामंजस्य करार करुन या सप्ताहाचा जणू जोरदार शुभारंभ केला आहे.
ब्लॅकस्टोन उद्योगसमुहापाठोपाठ कोकाकोला उद्योगसमूह देखील राज्यात पाचशे कोटींची गुंतवणूक करणार असल्याचे जाहीर केले आहे. न्यूयॉर्क येथे पोहोचलेल्या मुख्यमंत्र्यांच्या नेतृत्वाखालील शिष्टमंडळाने विविध आघाडीच्या उद्योगसमुहांच्या प्रतिनिधींशी यशस्वी चर्चा केली. त्याचे फलित लगेचच दिसून आले. अमेरिकेतील प्रसिद्ध ब्लॅकस्टोन उद्योगसमूहाने राज्यात 4500 कोटी रुपयांची घसघशीत गुंतवणूक करणार असल्याचे यावेळी जाहीर केले. त्यात हिंजेवाडी (पुणे) येथे 1200 कोटी, मध्य मुंबईतील आयटी पार्कमध्ये 1500 कोटी, मुंबईतीलच इतर आयटीपार्कमध्ये 1050 कोटी आणि ईऑन फ्री झोन सेझमध्ये 750 कोटी याप्रमाणे ही गुंतवणूक होणार आहे. याबाबत राज्य सरकारसह ब्लॅकस्टोन आणि पंचशील यांच्यासमवेतच्या सामंजस्य करारावार स्वाक्षऱ्याही करण्यात आल्या. ब्लॅकस्टोन ही वित्तीय सल्लागार आणि गुंतवणूक व्यवस्थापन विषयक जागतिक पातळीवरील आघाडीची संस्था आहे.
कोकाकोला कंपनीने महाराष्ट्रातील लोटे परशुराम (चिपळूण, जि. रत्नागिरी) येथे 500 कोटी रूपयांची गुंतवणूक करणार असल्याचे जाहीर केले.तसेच जगातील आघाडीची बँक असलेल्या सिटी बँकेचे प्रबंध संचालक (ऑपरेशन्स) जगदीश राव यांच्या नेतृत्त्वातील एका शिष्टमंडळाने आज मुख्यमंत्र्यांची भेट घेतली. सिटी बँकेचे भारतात सध्या 11 हजार कर्मचारी कार्यरतअसून या बँकेच्या महाराष्ट्रातही शाखा आहेत. मुंबई आणि पुण्यात बँक आपला कार्यविस्तार करणार असून नव्याने 4 हजार रोजगार निर्माण करण्याच्यायोजनेची त्यांनी यावेळी मुख्यमंत्र्यांना माहिती दिली.
अमेरिका आणि भारत उद्योग परिषदेच्या निमित्ताने (युएसआयबीसी)अमेरिकेच्या उद्योग जगतातील अनेक दिग्गजांनी मुख्यमंत्र्यांची भेट घेतली.अमेरिका व भारत सरकारच्या संयुक्त प्रयत्नातून 1975 मध्ये स्थापन झालेली ही परिषद दोन्ही देशातील उद्योग व्यापार विषयक संस्थांना व्यवसाय वृद्धीसाठी सहाय्य करते. यावेळी उपस्थित उद्योजकांना मुख्यमंत्र्यांनी संबोधित केले. इतर राज्यांच्या तुलनेत महाराष्ट्राचे असलेले वेगळेपण, जाचक अटींमधून उद्योगांचीकरण्यात येत असलेली मुक्तता, इज ऑफ डुईंग बिझनेस या मोहिमेंतर्गत सरकारने घेतलेला पुढाकार आदींची मुख्यमंत्र्यांनी उपस्थितांना माहिती दिली.
मेक इन इंडिया आणि मेक इन महाराष्ट्रसाठी आमचे सरकार कटिबद्धअसून महाराष्ट्र गुंतवणुकीच्या दृष्टीने एक मोठे केंद्र असल्याचे सांगून मुख्यमंत्री म्हणाले, राज्याच्या औद्योगिक क्षेत्रातील परवानाराज आम्ही संपुष्टात आणले आहे. उद्योगाच्या उभारणीसाठी लागणाऱ्या परवानग्यांची संख्या आम्ही 76 वरुन 37 वर आणली आहे. ही संख्या भविष्यात 25 इतकी कमी करण्यासाठी आमचे प्रयत्न सुरू आहेत. तसेच या परवानग्यांसाठी एकच प्लॅटफॉर्म तयार करण्यात येईल. हॉटेल उभारणीसाठी यापूर्वी 148 प्रकारच्या परवानग्या घ्याव्या लागत असत व त्यासाठी तब्बल दोन वर्षे वाया जात होती. ही संख्याही केवळ वीस इतकी कमी करण्यासाठी आम्ही लवकरच धोरण जाहीर करणार आहोत. त्यामुळे या परवानग्यांसाठी लागणारा कालावधी दोन महिन्यांपेक्षाही कमी असेल. दिल्ली-मुंबई औद्योगिक कॉरिडॉर, स्मार्ट सिटी, उत्पादनक्षम उद्योग, कृषी, नागरी उड्डयण, अभियांत्रिकी आणि आयटी क्षेत्रात भरीव गुंतवणुकीची प्रतीक्षा आहे, असे सांगून महाराष्ट्राच्या यशात भागीदार होण्याचे आवाहनही त्यांनीउद्योजकांना केले.
उद्योग परिषदेचे अध्यक्ष मुकेश अघी यांनी औद्योगिक क्षेत्रात अग्रेसर होऊ शकण्याची क्षमता महाराष्ट्रात असल्याचे सांगतानाच मुख्यमंत्र्यांच्या उद्योगविषयक भूमिकेची प्रशंसा केली. महाराष्ट्रात गुंतवणूक वाढीसाठी परिषदेच्या माध्यमातून प्रोत्साहन दिले जाईल, असेही त्यांनी सांगितले. या परिषदेला ताज हॉटेल, एचएसबीसी, कॅटरपिलर, कारगिल, जॉन्सन अँड जॉन्सन,केपीएमजी, बेकर अँड मॅकेन्झी, सिटी, न्यू सिल्क रूट, मोन्सॅटो आणि फायझर आदी उद्योगांचे प्रतिनिधी उपस्थित होते.
दरम्यान, आठवड्याभराच्या अमेरिका दौऱ्यासाठी मुख्यमंत्र्यांच्या नेतृत्वाखालील राज्याच्या शिष्टमंडळाचे अमेरिकी प्रमाण वेळेनुसार काल (दि.29 जून) सकाळी न्यूयॉर्कमध्ये आगमन झाले. त्यानंतर सकाळच्या सत्रात मुख्यमंत्र्यांनी न्यू जर्सीचे गव्हर्नर ख्रिस क्रिस्टी यांची भेट घेऊन विविध विषयांवर चर्चा केली. त्यात राज्यात इज ऑफ डुईंग बिझनेस अंतर्गत करण्यात आलेल्या उपाययोजना, सोशल मीडिया, सौर ऊर्जा आदी विषयांचा समावेश होता. श्री. क्रिस्टी यांनी महाराष्ट्र सरकारने केलेल्या विविध उपाययोजनांची प्रशंसा केली. मुख्यमंत्र्यांनी त्यांना महाराष्ट्रात येण्याचे निमंत्रण दिले.
-----०-----
