अनुसूचित जातीच्या जनतेने विशेष घटक योजनांचा लाभ घेऊन सर्वांगिण विकास साधावा : आ. प्रा.शरद पाटील

       

 धुळे, दि. 13 :- सामाजिक विषमता दूर होण्यासाठी शासनाच्या सामाजिक न्याय विभागाअंतर्गत अनुसूचित जातीच्या (विशेष घटक योजना) कल्याणकारी योजना राबविण्यात येतात. विशेष घटक योजनांच्या विविध योजनांचा लाभ  ग्रामीण भागातील तळागाळातील अनुसूचित जातीच्या जनतेने घेऊन सर्वांगिण विकास साधावा, असे आवाहन धुळे (ग्रामीण) चे आ. प्रा. शरद पाटील यांनी केले.

       धुळे तालुक्यातील सोनगीर येथील डॉ. बाबासाहेब आंबेडकर चौकात सामाजिक न्याय विभागाच्या  विशेष घटक योजनांचा प्रचार, प्रसिध्दी  ग्रामीण भागातील जनतेपर्यंत पोचविण्याच्या उद्देशाने जिल्हा माहिती कार्यालयाने उडाणे येथील क्रांती कृषि युवा बहुउद्देशीय संस्थेमार्फत आयोजित कलापथकाचे उदघाटन आ. प्रा. शरद पाटील यांच्या हस्ते काल झाले. यावेळी ते बोलत होते. प्रमुख पाहुणे विशेष जिल्हा समाज कल्याण विभागाचे वरिष्ठ समाजकल्याण निरीक्षक विलास करडक, जिल्हा माहिती अधिकारी जगन्नाथ पाटील,  माजी उपसरपंच कैलास वाणी, माजी सरपंच हाजी पठाण, ग्राम पंचायत सदस्य हसन पठाण, पराग देशमुख, केदार मोरे, आधार अण्णा, नेरकर, उपसरपंच प्रकाश गुजर हे होते.

       आ. प्रा. शरद पाटील म्हणाले की, स्वातंत्र्यपूर्व काळात संघर्ष करुन देश स्वातंत्र्य झाला.  परंतु श्रीमंत-गरीब ही दरी अजूनही दूर झाली नाही.  सामाजिक विषमता दूर होण्यासाठी कलापथकाच्या माध्यमातून शासनाच्या योजनांचे प्रबोधनाचा करण्याचा उद्देश चांगला आहे.

       क्रांती कृषि युवा बहुउद्देशीय संस्थेचे अध्यक्ष सुभाष शिंदे व त्यांचे सहकारी रोहित बागुल, संदीप सोनवणे, मनोहर कांबळे, प्रविण मोरे,आशा बि-हाडे, वर्षा  सुर्यवंशी, शितल पगार, मुकेश भामरे यांनी सामाजिक न्याय विभागाच्या विशेष घटक योजनेच्या  राबविण्यात येणा-या शासकीय कल्याणकारी योजनेतील भारत सरकार मॅट्रीकोत्तर शिष्यवृत्ती, शिक्षण फी, परीक्षा फी ई-स्कॉलरशिप योजना, शिक्षण फी, परीक्षा फी योजना (फ्रिशिप), राजर्षि छत्रपती शाहू महाराज गुणवत्ता शिष्यवृत्ती, राजर्षि छत्रपती शाहू महाराज गुणवत्ता पुरस्कार, सावित्रीबाई फुले शिष्यवृत्ती योजना व्यावसायिक पाठयक्रमाशी संलग्न असलेल्या वसतीगृहातील मागासवर्गीय विद्यार्थ्यांना निर्वाह भत्ता, पुस्तकपेढी योजना, सैनिकी शाळेतील अनुसूचित जाती, विमुक्त जाती भटक्या जमाती, विशेष मागासप्रवर्गातील विद्यार्थ्यांना निर्वाह भत्ता, अनुसूचित जातीच्या मुला-मुलींना परदेशात शिक्षणासाठी शिष्यवृत्ती तसेच मोटार वाहन चालक प्रशिक्षण, दादासाहेब गायकवाड सबळीकरण व स्वाभिमान योजना, पॉवर टिलर वाटप योजना, गटई कामगारांना पत्र्याचे स्टॉल पुरविणे, पुरस्कार, कन्यादान योजना, अनुसूचित जाती, जमाती कुटुंबातील सदस्यांना अर्थसहाय्य, घरकुल योजना तसेच शौचालय, एक व्यक्ती एक झाड  आदि योजनांची प्रभावी अंमलबजावणी होण्याच्या उद्देशाने कलापथकाच्या माध्यमातून विशेष जनजागृती केली.

       मान्यवरांचे स्वागत जिल्हा माहिती अधिकारी जगन्नाथ पाटील यांनी शाल, पुष्पगुच्छ देऊन केले तर प्रास्ताविकात वरिष्ठ समाजकल्याण निरीक्षक विलास करडक म्हणाले की, सामाजिक न्याय विभागाच्या व शासनाच्या विविध कल्याणकारी व्यक्तीगत व सामुहिक योजनांचा लाभ घेऊन आपला सर्वांगिण विकास करावा. शेवटी अध्यक्ष सुभाष शिंदे यांनी उपस्थितांचे आभार मानले. यावेळी सोनगील पंचक्रोशीतील महिला-पुरुष, विद्यार्थी-विद्यार्थीनी आदि बहुसंख्येने उपस्थित होते.

     शिरपूर येथे कलापथकाचा कार्यक्रम संपन्न

     शिरपूर येथील खालचेगांवातील डॉ.बाबासाहेब आंबेडकर चौकात आयोजित कलापथक कार्यक्रमाचे उदघाटन त-हाडी महात्मा फुले युवक मंडळ व बहुउद्देशिय संस्थेचे अध्यक्ष कचरु अहिरे यांच्या हस्ते काल झाले.  यावेळी क्रांती कृषि युवा बहुउद्देशीय संस्थेचे अध्यक्ष सुभाष शिंदे व त्यांचे सहका-यांनी अनुसूचित जाती उपयोजनेच्या (विशेष घटक योजना) विविध योजनांवर आधारित कलापथकाचा कार्यक्रम संपन्न झाला. यावेळी मान्यवर, महिला-पुरुष बहुसंख्येने उपस्थित होते.