मुंबई, दि.21 :राज्यातील
विविध महाविद्यालयातील अभ्यासक्रमाच्या फक्त प्रथम वर्षासाठी प्रवेश घेतलेल्या मागासवर्गातील
विद्यार्थ्यांनी शिष्यवृत्ती, शिक्षण शुल्क व परीक्षा शुल्क मिळण्यासाठी ऑनलाईन अर्ज तत्काळ भरण्याचे आवाहन मुंबई उपनगरच्या
समाज कल्याण विभागाचे सहाय्यक आयुक्तांनी केले आहे. https://mahaeschol.maharashtra.gov.inया संकेतस्थळावर
हा ऑनलाईन अर्ज भरण्याची मुदत 30 नोव्हेंबर 2015 अशी आहे.
सामाजिक न्याय विभागामार्फत महाविद्यालयात
शिकणाऱ्या अनुसूचित जाती, विजाभज, इमाव व विमाप्र या प्रवर्गातील विद्यार्थ्यांना शिष्यवृत्ती,
शिक्षण शुल्क व परीक्षा शुल्क देण्यात येते. त्यासाठी प्रत्येक वर्षी ऑनलाईन अर्ज करावे
लागत होते. परंतु सन 2015-16 या वर्षीपासून केवळ प्रथम वर्षाच्या (इ. 11 वी, प्रथम
वर्ष पदवी, पदविका, प्रमाणपत्र अभ्यासक्रम) मागासवर्गीय विद्यार्थ्यांनाच ऑनलाईन अर्ज
भरणे आवश्यक आहे. दुसऱ्या वर्षापासूनच्या विद्यार्थ्यांनी
प्रत्येक वेळी ऑनलाईन अर्ज भरण्याची आवश्यकता नसून त्यांच्या अर्जाचे नुतनीकरण महाविद्यालय
करणार असल्याचे सहायक आयुक्तांनी प्रसिद्धीपत्रकाद्वारे कळविले आहे.
प्रथम वर्ष अभ्यासक्रमाच्या विद्यार्थ्यांनी
सामाजिक न्याय विभागाच्या विविध योजनांना लाभ घेण्यासाठी तात्काळ ऑनलाईन अर्ज भरावे,
असे आवाहन सहायक आयुक्तांनी केले आहे.
000
कोणत्याही टिप्पण्‍या नाहीत:
टिप्पणी पोस्ट करा